«Истиқлол» муборизаро аз марҳалаи дуюм оғоз мекунад

Душанбе, 11 август. (АМИТ «Ховар», Пайрав Назаров). – Дар Федератсияи футболи Тоҷикистон қуръапартоӣ барои дарёфти Ҷоми миллии Тоҷикистон дар соли 2011 баргузор шуд.Имсол дар мусобиқот барои дарёфти Ҷоми Тоҷикистон 21 даста аз ҷумлаи дастаҳои лигаи олӣ ва 9 намояндаи гурӯҳи аввал, ҳамчунин пешсафи мусобиқоти вилояти Суғд – дастаи «Истарафшан» иштирок менамоянд.Дастаи футболи «Истиқлол»-и шаҳри Душанбе ба ҳайси дорандаи Ҷоми Тоҷикистон дар даври аввали бозиҳо иштирок накарда, муборизаро аз даври дуюм шурӯъ мекунад. Дар даври аввал 10 дастаи лигаи олӣ бо 10 дастаи гурӯҳи дуюм барои пайдо намудани роҳхат ба даври минбаъдаи мусибоқот қувваозмоӣ менамоянд. Дар даври дуюм дастаҳо бо усули қуръапартоӣ ба якчанд ҷуфт тақсим карда мешаванд.Бозиҳои ҷавобии даври аввал рӯзи якшанбеи 28 август сурат мегиранд.