Муҳокимаи таъмини амният ва таҳкими марзҳои сарҳадӣ бо Афғонистон

Душанбе, 24 август. (АМИТ «Ховар», Пайрав Назаров). – 23 августи соли 2011 зимни вохӯрии Сафири Фавқулодда ва Мухтори Ҷумҳурии Тоҷикистон дар Ҷумҳурии Австрия Нуриддин Шамсов бо роҳбарияти Вазорати корҳои дохилии Австрия вазъи ҳамкории дуҷониба ва бисёрҷонибаи Тоҷикистон ва дурнамои мусоидати Иттиҳоди Аврупо ба ҳукумати кишвар дар бахши таъмини амният ва таҳкими марзҳои сарҳадӣ бо Афғонистон муҳокима гардид.Дар ҷараёни мулоқот бо Ҳамоҳангсози робитаҳои байналмилалии Вазорати корҳои дохилии Австрия Тобиас Ҷеймс ҷониби Тоҷикистон раванди имрӯзаи ҳамкориро дар соҳаи мазкур бо Австрия мусбат арзёбӣ кард. Ҳамзамон, бо ишора ба чолишҳо ва таҳдидҳои амниятии ҷойдошта, ки аз қаламрави кишвари ҳамсоя сарчашма мегиранд, сафир хостгори тавсеаи ҳамкории самарабахш миёни тарафҳо ва расонидани кӯмаки амалии моддию техникӣ аз ҷониби кишварҳои Иттиҳоди Аврупо ба Тоҷикистон барои ҳифзи минбаъдаи амнияту суботи минтақавӣ шуд. Зимни музокирот Т. Ҷеймс ба натиҷаҳои Конфронси байналмилалии бахшида ба амнияти сарҳадӣ (Душанбе, соли 2008) ва Анҷумани 9-уми КАБСИ (Ташаббуси Иттиҳоди Аврупо дар соҳаи таҳкими амнияти марзӣ дар Осиёи Марказӣ) баҳои баланд дод. Ҷониби Австрия таъкид намуд, ки Иттиҳоди Аврупо, пеш аз ҳама Австрия тасмим гирифтааст, ки зимни татбиқи марҳилаи 8-уми лоиҳаи БОМКА ва Стратегияи нави Иттиҳоди Аврупо барои Осиёи Марказӣ расонидани кӯмаки амалиро барои Тоҷикистон вусъат диҳанд. «Бо мақсади татбиқи амалии тавсияҳо ва хулосаҳои Анҷумани КАБСИ, ки 15-16 марти соли равон дар Душанбе баргузор гардид, ҳукумати Австрия ва Иттиҳоди Аврупо барои сафарбар кардани кишварҳои мададрасон ва муассисаҳои байналмилалии молиявӣ кӯшиш ба харҷ хоҳанд дод», — илова намуд Т. Ҷеймс.