О. Гаврук: «Мубодилаи маҳсулот миёни Тоҷикистону Белорус 8 маротиба боло рафтааст»
Душанбе, 19 август. (АМИТ «Ховар», Дилшодаи Хайруллоҳ). – Имрӯз Президенти Ҷумҳурии Тоҷикистон Эмомалӣ Раҳмон аз нахустин Сафири фавқулодда ва мухтори Ҷумҳурии Белорус Олга Гаврук эътимоднома қабул намуд.Олга Гаврук ба хабарнигорон гуфт, ки: «Ман ба худ шараф медонам, ки ҷумҳурии Белорусро дар Тоҷикистон муаррифӣ мекунам. Тоҷикистон бо фарҳанги бою таърихии худ машҳур гардидааст. Ҳаминро гуфтаниям, ки ман охири солҳои 90-ум дар Тоҷикистон будам. Айни ҳол мебинам, ки кишвари шумо хеле рушд кардааст. Тӯли ин солҳо ободонии зиёд мушоҳида мешавад». Белорус имсол бори аввал намояндагии дипломатии худро кушод ва ман нахустин сафири ин кишвар дар Тоҷикистон мебошам. Мо умедворем, ки ин баҳри рушди муносибатҳои дуҷониба миёни Тоҷикистону Белорус заминаи хуб мешавад. Тавре ҷаноби президент зимни суханронияш иброз намуд, ҳар ду кишвар захираҳои зиёди ҳамкориҳои судманд доранд, ки то ҳол истифода нашудаанд, тазаккур дод ӯ. Ҳамчунин ӯ зикр намуд, ки Белорус метавонад ба Тоҷикистон маҳсулоти зиёдро аз қабили техникаву мошинҳои белорусӣ, маводи ғизоӣ, маҳсулоти ниёзи аввалия фиристода, ҳамчунин дар навбати худ Тоҷикистон метавонад ба мо пахта, мева ва хушкмева судур кунад. Гуфтан ба маврид аст, ки соли 2003 мубодилаи маҳсулот миёни Тоҷикистону Белорус 6-миллион долларро ташкил медод. Ин шумора дар соли 2010-ум ба 48 миллион доллар расид. Тавре шумо мушоҳида намудед, дар як муддати кӯтоҳ мубодилаи маҳсулот 8 маротиба боло рафтааст. Дар оянда мо имкон дорем, ки ин шумораро боз ҳам боло бардорем, -зикр намуд дар охир Олга Гаврук.








Имрӯз дар ноҳияҳои кӯҳии Тоҷикистон ҳаво то 12 дараҷа гарм мешавад
МегаФон Тоҷикистон: МегаҚувва гигабайтҳоро дучанд менамояд
Ҳамкории Тоҷикистон ва Созмони ҳамкории иқтисодӣ баррасӣ гардид
Дар Кумитаи хоҷагии манзилию коммуналӣ бахшида ба Рӯзи Президент чорабинии тантанавӣ баргузор гардид
Дар шаҳри Панҷакент маркази хизматрасонӣ ва тарабхона ба истифода дода шуд
Дар Кӯлоб барои омодагӣ ба ҳолатҳои фавқулода ҷаласа доир шуд
Бахшида ба Рӯзи Президент дар шаҳри Бӯстон Рӯзи дарҳои кушод доир гардид
ПАНҶАКЕНТИ ҚАДИМ. Оид ба омӯзиши он конференсияи илмӣ баргузор шуд






