Омодагӣ ҷиҳати садамаи ҳавопаймо дар фурудгоҳи Душанбе

Душанбе 17 август (АМИТ «Ховар» Мавзуна Бойева) — Аз рўи нақшаи кории Кумитаи ҳолатҳои фавқулодда ва мудофиаи граждании назди Ҳукумати ҶТ дар Фурудгоҳи байналмилалии Душанбе машқи муштарак бо ҷалби дастаҳои наҷотдиҳии ҶСК «Фурудгоҳи байналмилалии Душанбе», ҶСК «Тоҷик Эйр» ва КВД «Тоҷикаэронавигатсия» гузаронида шуд.
 
Дар рафти машқ фаъолияти мақомоти идории ҷамъиятҳои наҷотдиҳии ғайриҳарбӣ ҳангоми барҳамзании ҳолатҳои фавқулодда дар ҳолати садамавӣ фуруд омадани ҳавопаймо зери мушоҳидаи нозирон қарор гирифт. Эҳтимолияти машқ ҳамин буд, ки ҳавопаймо дар ҳолати садамавӣ фуруд меояд ва эҳтимоли сар задани сўхтор ва осеб дидани мусофирон мавҷуд аст, дар дохили салон мойеъи дорои гази химиявӣ паҳн мегардад. Барои барҳам задани ҳолати баамаломада ва наҷот додани мусофирон дастаҳои наҷотдиҳии корхонаҳо муштарак амал намуда, амалиёти наҷотдиҳиро дар мӯҳлати муайяншуда анҷом доданд.Котиби дафтари матбуоти ҶСК «Фурудгоҳи байналмилалии Душанбе» Маҳмадюсуф Шодиев ба мухбири АМИТ «Ховар» иттилоъ дод, ки роҳбарии кулли машқҳоро муовини директори генералии ҶСК «Фурудгоҳи байналмилалии Душанбе» Азиз Иброҳимов бар ўҳда дошта, рафти машқҳои наҷотдиҳиро сардори Раёсати фаврии Кумитаи ҳолатҳои фавқулодда ва мудофиаи гражданӣ полковник Х.Қодирбердиев назорат кард.