Рушди қонунгузории Тоҷикистон дар солҳои Истиқлолият

Душанбе, 16 август.(АМИТ «Ховар», Марзия Саидова).- «Инкишофи қонунгузории Ҷумҳурии Тоҷикистон дар замони истиқлолият» — таҳти чунин унвон рӯзҳои 26 ва 29 август дар Душанбе ду конфронси ҷумҳуриявии илмӣ-амалӣ ба ифтихори 20-умин солгарди ҷашни Истиқлолияти давлатии Ҷумҳурии Тоҷикистон баргузор мегардад. Маркази миллии қонунгузории назди Президенти Ҷумҳурии Тоҷикистон ташаббускори баргузории ин чорабиниҳо аст.Интизор меравад, ки дар конфронсҳо вакилони палатаи поёнӣ ва болоии парлумони мамлакат, намояндагони Дастгоҳи иҷроияи Президенти Ҷумҳурии Тоҷикистон, вазорату идораҳои давлатӣ, намояндагони мақомоти ҳокимияти судӣ, инчунин олимон ва мутахассисони бахши ҳуқуқ ширкат намуда, маърӯза менамоянд. Тибқи иттилои Маҳмад Раҳимов директори Маркази миллии қонунгузории назди Президенти Ҷумҳурии Тоҷикистон дар конфронсҳо рушди соҳаҳои гуногуни қонунгузории Ҷумҳурии Тоҷикистон дар тӯли 20 соли истиқлолияти давлатии Ҷумҳурии Тоҷикистон, бахусус рушди қонунгузории ҷиноӣ, шаҳрвандӣ, соҳибкорӣ, бонкӣ, асъорӣ, рақобат, соҳибкории хориҷӣ, иттилоотӣ, тандурустӣ, маориф, меҳнат, таъминоти иҷтимоӣ, инчунин ташаккули ҳуқуқи байналмилалии оммавӣ ва хусусӣ дар Ҷумҳурии Тоҷикистон матраҳ мегарданд.