Рушди Ҷумҳурии Тоҷикистон дар давраи соҳибистиқлолӣ

Душанбе, 24 август. (АМИТ «Ховар», Дилшодаи Хайрулло). – Бахшида ба таҷлили ҷашни 20-солагии Истиқлолияти давлатии Ҷумҳурии Тоҷикистон бо ташаббуси Сафорати Ҷумҳурии Тоҷикистон дар Ҷумҳурии Ҳиндустон ва ҳамкорӣ бо маркази илмӣ — фарҳангии сафорати Русия 19 августи соли равон дар шаҳри Деҳлӣ дар мавзӯи «Рушди Ҷумҳурии Тоҷикистон баъди соҳибистиқлолӣ» семинар баргузор гардид. Дар кори семинар зиёда аз 150 нафар меҳмонон аз доираҳои сиёсӣ, иқтисодӣ, илмӣ, фарҳангӣ ва корпуси дипломатии ин кишвар иштирок намуда, 8 нафар дар мавзӯъҳои гуногун оид ба рушди Тоҷикистон маърӯза намуданд. Дар рафти кори семинар инчунин намоиши филми ҳуҷҷатӣ дар бораи Тоҷикистон ва намоиши аксҳо перомуни Ҷумҳурии Тоҷикистон пешкаши иштирокдорон гардид. Дар ин бора ба АМИТ «Ховар» аз сафорати Ҷумҳурии Тоҷикистон дар Ҷумҳурии Ҳиндустон иттилоъ доданд.