Таҷдиди роҳи мошингарди Қурғонтеппа-Дӯстӣ дар арафаи анҷомёбист

Душанбе, 3 август. (АМИТ «Ховар», Кристина Эрлих). – Дар роҳи мошингарди Қурғонтеппа-Дӯстӣ, ки тармиму таҷдиди он соли 2009 оғоз шуда буд, мутахассисон ба марҳалаи анҷомёбӣ, яъне асфалтпӯш намудани он шурӯъ намуданд. Дар иншоот қариб 90 фоизи корҳо анҷом ёфта ва то охири соли ҷорӣ пурра ба итмом мерасад.Дар ин бора ба хабарнигори АМИТ «Ховар» аз Вазорати нақлиёти Ҷумҳурии Точикистон хабар доданд.«Ҳамаи корҳои сохтмонию барқароркунӣ тибқи нақша сурат мегиранд. Баъди анҷоми асфалтпӯшӣ барқароркунии нишонаҳои сари роҳ оғоз меёбад», илова намуд манбаъ.Ёдовар мешавем, ки масофаи умумии роҳи мошингард 42 километрро ташкил медиҳад. Маблағи лоиҳа 35 млн. доллари ИМА буда, онро Ҳукумати Ҷопон ҳамчун кӯмаки бебозгашт ба кишвари мо додааст.«Баъди ба истифода додани роҳ тибқи созишномаи қаблан ба имзо расидаи миёни Вазорати нақлиёти ҶТ ва пудратчиҳои генералии ширкатҳои Dai Nipon ва Nipo corporation-и Ҷопон пудратчии асосӣ дар мӯҳлати кафолатӣ (як сол) роҳи автомобилгардро ҳифзу муроқиба менамояд», илова намуданд дар Вазорати нақлиёти ҶТ.