Тасдиқи Нақшаи кӯчонидани муҳоҷирони экологӣ

Душанбе, 22 август. (АМИТ «Ховар», Бекназари Абӯбакр). – Мутобиқи қарори раиси вилояти Суғд «Нақшаи миёнамӯҳлати муташаккилона кӯчонидани муҳоҷирони экологӣ барои солҳои 2011 – 2013» ба тасвиб расид.Аз хадамоти матбуоти раиси вилояти Суғд ба АМИТ «Ховар» иттилоъ доданд, ки тибқи қарори ба тавсиб расида раисони шаҳрҳои Хуҷанд, Исфара, Панҷакент, ноҳияҳои Айнӣ, Ғончӣ, Ашт, Шаҳристон ва Спитамен вазифадор гардиданд, ки кӯчонидан ва қабули муҳоҷирони экологиро ба маҳалли нави бехавф мутобиқи рӯйхатҳои ба Вазорати меҳнат ва ҳифзи иҷтимоии аҳолии Ҷумҳурии Тоҷикистон пешниҳодгардида дар давоми солҳои 2011 — 2013 таъмин намоянд ва ҳар сол то 1 ноябр мавзеи кӯчонидани муҳоҷиронро тибқи тартиби муқарраргардида муайян намуда, то 1 март корҳои омодагиро барои кӯчонидани муҳоҷирон мутобиқи нақша анҷом диҳанд.Ҳамчунин, ба Сарраёсати Агентии давлатии ҳифзи иҷтимоӣ, шуғли аҳолӣ ва муҳоҷират дар вилоят супориш дода шуд, ки дар асоси қарорҳои раисони шаҳру ноҳияҳои вилоят перомуни ҷудо намудани қитъаҳои замин барои кӯчонидани хоҷагиҳо аз минтақаҳои хавфнок аз рӯи меъёрҳои муқарраргардида маблағгузориҳоро барои расонидани кӯмаки яквақтаина ва додани қарзи имтиёзнок тавассути шӯъбаҳои Бонки давлатии амонатгузории «Амонатбонк» таъмин намояд.