Қарзҳои Вазорати мелиоратсия ва захираҳои об дар назди “Барқи Тоҷик” меафзояд

Душанбе, 29 сентябр. (АМИТ «Ховар», Дилшодаи Хайруллоҳ).- Ҳукумати ҷумҳурӣ дар солҳои 2010-2011 барои Вазорати мелиоратсия ва захираҳои об тарифи имтиёзноки 1,5 дирам барои истифодаи як киловатт/соат барқ ҷорӣ намуд. Арзиши миёнаи солонаи қувваи барқ барои пойгоҳҳои обкашӣ бо назардошти ин тарифҳои имтиёзноки мавсимӣ бо ҳисоби андоз аз арзиши иловашуда ҳамагӣ 2,58 дирамро ташкил медиҳад, ки ин нисбат ба арзиши миёнаи тарифи қувваи барқ 5,56 дирам кам мебошад. Тавре аз Ширкати “Барқи Тоҷик” ба мухбири мо иттилоъ доданд, новобаста аз ин қарзи Вазорати мазкур дар назди Ширкати “Барқи Тоҷик” ба ҷойи паст шудан баръакс зиёд шуда истодааст. Дар соли 2010 аз 17 млн. сомонӣ қарзҳои Вазорат ҳамагӣ 2,3 млн. сомонӣ (13 фоиз) пардохт шудааст, ки дар натиҷа қарз боз ба маблағи 14,7 млн. сомонӣ зиёд гардид. Дар 8 моҳи соли ҷорӣ қарзҳои Вазорати мелиоратсия ва захираҳои об дар назди Ширкати “Барқи Тоҷик” 21 млн. сомонӣ зиёд шуда, то 1-уми сентябри соли 2011 он 175,4 млн. сомониро ташкил дод. Илова бар ин, қарзи оби эҳтиёҷоти кишоварзӣ дар назди Вазорати мелиоратсия ва захираҳои об то 1 сентябри соли ҷорӣ 202,2 млн. сомониро ташкил медиҳад.