Ҷамъоварии ҳаққи барқ дар Кӯлоб

Кӯлоб, 26 сентябр. (АМИТ «Ховар», С. Холов). – Бино ба иттилои ҷонишини раиси идораи фурӯши барқи шаҳри Кӯлоб Амирхон Файзов ҷамъоварии ҳаққи барқ дар моҳи август 87 фоизро дар бар гирифта, аммо бақияпулиҳо (қарздорӣ) то ин ҷониб аз тарафи ташкилоту муассиса ва аҳолӣ боқӣ мондаанд. Қарзи умумии хизматрасонии барқ дар шаҳри Кӯлоб ба 14 миллион сомонӣ расида, 450 ҳазор сомонии он ба корхонаи КУМО – и ноҳияи Восеъ тааллуқ дорад, ки нисбат ба ин корхона аз тарафи шӯъба санад тартиб дода шуда, ба прокуратураи шаҳр равона гардидааст. Файзов афзуд, ки айни ҳол кормандони шӯъба ба насб кардани ҳисобкунакҳои барқӣ сафарбар гардида, то ин дам 1800 ҳисобкунак насб карда, аз дохили хонаҳои истиқоматӣ ба ҷойҳои бехавф кӯчонидаанд ва тасмим гирифтаанд то охири сол тамоми аҳолии шаҳрро ба ҳисобкунак таъмин намоянд.