Ҷашни Истиқлолият дар ВМКБ чӣ гуна таҷлил мегардад?

Душанбе, 4 сентябр. (АМИТ «Ховар», Лутфишо Додо). – Дар шаҳру навоҳии ВМКБ 20-умин солгарди таҷлили Истиқлолияти давлатии ҷумҳурӣ бо шаҳомати хоса истиқбол карда мешавад. Тавре ба хабарнигори АМИТ «Ховар» аз мақомоти иҷроияи ҳокимияти давлатии вилоят иттилоъ доданд, рӯзи 7-уми сентябр дар шаҳри Хоруғ ҷамъомади тантанавӣ баргузор мегардад. Субҳи рӯзи 8-ум намоиши аҳли меҳнати идороту муассисот, сарбозону афсарони қисми низомии дар вилоят мустақар доир мегардад. Шоми ҳамон рӯз дар варзишгоҳи марказии шаҳр намоиши театрикунонидашуда ва барномаи консертӣ бо иштироки санъаткорони беҳтарини вилоят пешкаши сокинон мегардад. Рӯзи 9-уми сентябр дар Боғи истироҳат ва фароғати шаҳр маҳфили идона бо иштироки хонандагони макотиби шаҳр ва донишҷӯён гузаронида мешавад.