Ҷиноят сарҳад ва ҷинояткор хешутаборӣ надорад

Душанбе, 23 сентябр. (АМИТ «Ховар», Лаззат Диловарзод).- Бино ба гуфти муфатиши прокуратураи ноҳияи Фирдавсии шаҳри Душанбе Алишер Салимзода, ҳанӯз 25 – уми марти соли 2011 Умед Талбаков, ки муваққатан дар бинои 110, ҳуҷраи 37 –и кӯчаи Борбади шаҳри Душанбе иҷоранишин буд, ба хонаи писарамакаш Ҷамшед Назаров, ки дар  бинои 104  ҳуҷраи 59 –и  кӯчаи номбурда истиқомат мекард  ба меҳмонӣ рафта, баъди хӯрдани хӯроки шом миёнашон муноқиша ба амал омад, ки  дар натиҷа Умед Талбаков ба шикам, гардан ва қафаси синаи писарамакаш, Ҷамшед Назаров, ки   соҳибкор  буд,  бо корди ошхонагӣ 16 зарба мезанад. Дар натиҷа  Ҷамшед Назаров дар ҷои ҳодиса ба ҳалокат мерасад. Рӯзи 26 – уми март   Умед Талбаков чун гумонбар дастгир гардида, нисбат ба ӯ бо моддаи 249 — и КҶ ҶТ (роҳзанӣ) ва моддаи 104 – и КҶ ҶТ (куштор) бандҳои «е», «ж» «л» парвандаи ҷиноӣ оғоз карда шуд. Баъди таҳқиқи ҳаматарафа, парванда бо гуноҳи роҳзанӣ ва куштор ба суди шаҳри Душанбе ирсол гардид. Суд баъди додани баҳои ҳуқуқӣ  ба парванда,  ҷинояткор Умед Талбаковро  ба мӯҳлати 21 сол аз озодӣ маҳрум ва равонаи маҳбас намуд.