Дар ҷумҳурӣ ҷамъоварии ғалла идома дорад

Душанбе, 15 сентябр. (АМИТ «Ховар», Лаззат Диловарзод).- Бино ба иттилои фаврии Раёсати растанипарварии Вазорати кишоварзӣ, соли ҷорӣ дар масоҳати 300 ҳазору 213 гектар ғалла кишт шуд, ки то 12 – уми сентябри соли ҷорӣ ҳосили 238 ҳазору 742 гектари он даравида шудааст.Тибқи маълумоти фаврии раёсати мазкур, ҳосили умумии ғаллаи кӯфташуда 484 ҳазору 902 тоннаро ташкил дод. Аз ғаллаи кӯфташуда 418 ҳазору 725 тоннаашро гандум ташкил медиҳад.Барои таъмини аҳолии ҷумҳурӣ бо ғалла дар як сол 1 миллиону 300 ҳазор тонна ғалла истеҳсол намудан лозим меояд. Ҷумҳурӣ ҳамасола ба миқдори 550 – 600 ҳазор тонна ғалла истеҳсол менамояд, ки он барои таъмини аҳолӣ бо озуқа кифоя нест. Аз ин рӯ, ҳамасола аз хориҷи кишвар аз 400 то 600 ҳазор тонна гандум ворид мешавад.