Дар Кобул собиқ Президенти Афғонистон кушта шуд

Душанбе, 21 сентябр. (АМИТ «Ховар»). – Тавре ИТАР — ТАСС хабар медиҳад, 20 сентябр бар асари таркиши бомбае, ки онро террористи толиб дар саллааш пинҳон карда буд, собиқ Президенти Афғонистон Бурҳониддин Раббонӣ кушта шуд.Бурҳониддин Раббонӣ Раиси Шӯрои Олии Сулҳи Афғонистон буд, ки мақсадаш гузаронидани гуфтушунид бо ҳаракати «Толибон» дар бораи ҳалли сулҳомези ихтилофоти мусаллаҳона дар Афғонистон аст. Террористи фидоӣ бомбаро дар лаҳзае тарконид, ки Раббонӣ дар хонааш бо ду нафар намояндагони толибон гуфтушунид мекард. Мувофиқи маълумоти Би – би – си, яке аз ин ду нафар террористи фидоӣ будааст.Дар натиҷаи таркиш мушовири президенти Афғонистон Ҳомид Карзай Маъсум Станекзай, ки дар гуфтушуниди сулҳомез иштирок дошт, сахт маҷрӯҳ гардид. Дар гуфтушунид ҳамчунин мушовири Раббонӣ дар бахши амният низ иштирок дошт. Дар бораи сарнавишти ӯ, ҳамчунин дар мавриди эҳтимолан зинда мондани толиби дуюми дар гуфтушунид ҳузурдошта хабар дода намешавад.Намояндагони хадамоти махсуси Афғонистон изҳор доштанд, ки мувофиқи маълумоти пешакӣ, ҳар ду вакили толибон, ки барои гуфтушунид бо Раббонӣ ба Кобул омада буданд, террористони фидоӣ будаанд.«Вазъияти куштори Раббонӣ сӯиқасд ба ҷони ҳамсафи ӯ дар бахши роҳбарӣ ба Эътилофи шимолии зидди толибон Аҳмадшоҳ Масъудро ба хотир меорад. Моҳи сентябри соли 2001, ду рӯз қабл аз амалиёти террористӣ дар Ню – Йорк ва Вашингтон, дар шимоли Афғонистон ба ҷони Масъуд сӯиқасд шуда буд. Террористоне, ки бо вонамуди хабарнигорони телевизион ба назди Масъуд омада буданд, бомбаи дар дохили дастгоҳи наворгиранда пинҳон кардашударо тарокониданд», — қайд менамояд ИТАР — ТАСС.