Дастаҳои футболи Эрон аз бозиҳои лигаи қарамонии Осиё хориҷ шуданд

Душанбе, 30 сентябр. (АМИТ «Ховар, Аловиддин Бӯриев»).- «Фӯлоди Муборакии Сипоҳон» ва «Зубоҳан»- ду тими машҳури Эрон баъди рақобатҳои даври баргашти вохӯриҳои якчаҳорниҳоии ҷоми қаҳрамонҳои  Осиё ҳуқуқи давом додани муборизаро барои ин ҷом аз даст доданд. Дастаи «Фӯлоди Муборакии Сипоҳон» дар сафар бо тими «Ал-Садд»-и Қатар вохӯрда, бо натиҷаи 2 бар 1 ғолиб омад, вале дар маҷмӯъ дар ҷамъи ду вохӯрӣ бо нишондоди 3 бар 2 мағлуб дониста шуд. «Зубоҳан» бошад дар шаҳри Исфаҳон аз ҳарифи худ «Сувон Самсунг Блувинс»-и Корея бо ҳамин натиҷа : 1 бар 2 шикаст хӯрд. Вохӯрии нахустини ин дастаҳо бо натиҷаи мусовии 1 бар 1 ба анҷом расида буд. Акнун дар вохӯрии нимниҳоии ҷоми қаҳрамонҳои Осиё «Сувон Самсунг Блувинс» бо «Ал-Садд» ва «Ал-Иттиҳод»- Арабистони Саудӣ бо «Чеонбук Хундай Моторс» қувва меозмоянд. Тибқи низомнома дастаҳо ду маротиба  дар майдони худ ва  сафар  бозиҳояшонро барпо мекунанд. Бозии аввал рӯзи 19 ва бозии ҷавобӣ рӯзи 26-уми октябр гузаронида хохад шуд.