Дипломатҳо дар Данғара

Душанбе. 28 сентябр.(АМИТ «Ховар», Марзия Саидова).-Абдуҷаббор Раҳмонов, вазири маорифи Тоҷикистон, аз ноҳияи Данғара боздид намуда, бо вазъи муассисаҳои таълимии он ошно гардид. Тибқи иттилои Ноилшо Нуралиев, котиби матбуотии Вазорати маорифи ҷумҳурӣ Сафири Фавқулодда ва Мухтори Ҷумҳурии Тоҷикистон дар Ҷопон Ғуломҷон Бобозода, Сафири Ҷопон дар Ҷумхурии Тоҷикистон Йошихиро Накоями, намояндаи Агентии ҳамкориҳои байналмилалии Ҷопон дар Тоҷикистон Иида Сан ва мудири шӯъбаи робита бо кишварҳои хориҷии Дастгоҳи иҷроияи Президенти ҷумҳурӣ Олим Раҳимов вазиррро дар сафар ба Данғара ҳамроҳӣ намуданд. Дар филиали Донишгоҳи аграрии Тоҷикистон дар ноҳияи Данғара меҳмононро устодону донишҷӯён ва хонандагони Литсейи касбии саноати кишоварзии ба номи Ютако Акинои ноҳияи Данғара истиқбол гирифтанд. Раиси ноҳияи Данғара Маҳмадулло Саидалиев, вазири маориф Абдуҷаббор Раҳмонов ва дипломатҳои тоҷику ҷопонӣ — Ғуломҷон Бобозода ва Йошихиро Накоями роҷеъ ба сатҳи ҳамкориҳои мутақобилан судманди Тоҷикистону Ҷопон ва иқдомоти ин кишвар дар рушди соҳаҳои гуногуни Тоҷикистон, хусусан бахши иқтисод, маориф табодули назар карда, ба сатҳи ҳамкориҳои ҳар ду кишвар баҳои баланд доданд. Зикр шуд, ки аз ҷониби Агентии ҳамкориҳои байналмилалии Ҷопон дар Тоҷикистон дар бахшҳои роҳсозӣ, таъмини аҳолӣ бо оби ошомиданӣ ва ҳамкориҳои гуманитарӣ, бахусус таҳсили шаҳрвандони тоҷик дар муассисаҳои таҳсилоти олии касбии Ҷопон як қатор лоиҳаҳо амалӣ шуда истодаанд, ки шаҳодати тавсеаи ҳамкориҳои Тоҷикистону Ҷопон ва дурнамои неки он аст.