Кишоварзони Форс дар Хатлон
Душанбе, 19 сентябр.(АМИТ «Ховар», Марзия Саидова).-Эрон дар заминаи бахши кишоварзӣ ҳамкории худро бо Тоҷикистон густариш дода, ҷиҳати рушди он сармоягузорӣ менамояд. Далели ин ташрифи ҳайати кишоварзони вилояти Форс таҳти роҳбарии Муҳандис Хирад, Раиси Созмони кишоварзии вилояти Форси Эрон ба Тоҷикистон аст. Аббос Баёнӣ, масъули бахши иқтисод ва тиҷорати Сафорати Эрон дар Душанбе зимни сӯҳбат ба хабарнигори АМИТ «Ховар» иттилоъ дод, ки ҳайати мазкур дар доираи татбиқи Ёддошти тафоҳуми ҷаласаи 8-уми Комиссияи муштараки байниҳукуматии ҳамкориҳои иқтисодию тиҷоратӣ озими Душанбе гардид. Баёнӣ афзуд, ки ҳадафи сафари ҳайати мазкур ба Тоҷикистон омӯзиши вазъи кишоварзии Тоҷикистон ва тавсеаи сармоягузорӣ дар ин бахш мебошад. Ҳайати кишоварзони эронӣ, ки аз 18 нафар иборат аст, зимни боздид аз Тоҷикистон бо Раҳим Назаров, муовини вазири кишоварзии Тоҷикистон ва Раиси вилояти Хатлон Ғайбулло Афзалӣ мулоқот намуда, бо вазъи заминҳои киштбоби ин минтақа шинос гардиданд.Назар ба иттилои Баёнӣ дар соли 2010 гардиши мол байни Тоҷикистону Эрон 210 миллион долларро ташкил дода, тӯли соли равон 15% афзоиш ёфтааст. Алҳол, дар Тоҷикистон 70 ширкати эронӣ дар бахшҳои саноатӣ, тиҷоратӣ ва кишоварзӣ фаъол буда, аз он 40 ададашро корхонаҳои муштарак ташкил медиҳанд.