Куриёи Ҷанубӣ ба масоили муҳоҷирати меҳнатӣ таваҷҷӯҳ дорад

Душанбе, 12 сентябр. (АМИТ «Ховар», Лутфия Эшонқулова). – 8 сентябри соли 2011 дар шаҳри Душанбе мулоқоти сардори Хадамоти муҳоҷирати назди Ҳукумати Ҷумҳурии Тоҷикистон Сафиалло Девонаев бо Сафири Фавқулодда ва Мухтори Кореяи Ҷанубӣ Ро Сонг Мин баргузор шуд. Тибқи иттилои маркази матбуоти Хадамоти муҳоҷират дар ҷараёни мулоқот Сафиалло Девонаев ба сафир дар бораи таъсиси сохтори мустақили Хадамоти муҳоҷирати назди Ҳукумати Ҷумҳурии Тоҷикистон маълумот дод. С. Девонаев зикр намуд, ки айни замон бо баъзе кишварҳои хориҷӣ перомуни масоили муҳоҷирати меҳнатӣ робита барқарор гардидааст. Ёдовар мешавем, ки баъди ташрифи Раиси Маҷлиси намояндагони Маҷлиси Олии ҶТ Шукурҷон Зуҳуров ба Кореяи Ҷанубӣ имконияти ҳамкорӣ бо ин кишвар фароҳам омад. Сафири Фавқулодда ва Мухтори Кореяи Ҷанубӣ Ро Сонг Мин перомуни барқарор намудани ҳамкориҳо зикр намуд, ки кишвари ӯ ба рушди ҳамкориҳо доир ба масоили муҳоҷирати меҳнатӣ низ таваҷҷӯҳ дорад. Дар доираи мулоқот ҷонибҳо ҳамчунин масоили дигари муҳоҷиратро мавриди баррасӣ қарор доданд.