Мулоқоти Қоҳир Расулзода бо намояндагони ширкати «Santos»-и Австралия
Душанбе, 19 сентябр. (АМИТ «Ховар», Бекназари Абӯбакр). — 17 сентябр раиси вилояти Суғд Қоҳир Расулзода бо намояндагони ширкати «Santos»-и Австралия, ки бо сафари корӣ ба вилоят ташриф овардаанд, мулоқот намуд.Аз хадамоти матбуоти раиси вилояти Суғд ба АМИТ «Ховар» иттилоъ доданд, ки Қоҳир Расулзода оид ба вазъи иҷтимоӣ ва иқтисодӣ, соҳаҳои муҳими хоҷаги халқии вилоят, дастовардҳои мардуми минтақа дар солҳои соҳибистиқлолии кишвар таҳти роҳбарии Президенти мамлакат Эмомалӣ Раҳмон, равобити иқтисодии вилоят бо ширкатҳои хориҷӣ ва фароҳам омадани шароити мусоид барои фазои сармоягузорӣ маълумот дод.Роҳбари гурӯҳи корӣ, роҳбари лоиҳаҳои сармоягузории ширкати «Santos»-и Австралия дар кишварҳои Осиё Билл Овенден ба раиси вилоят дар бораи ҳадафи сафари корӣ ва фаъолияти ширкати мазкур ҳарф зада, таассуроти неку рангини худро аз Тоҷикистон, бахусус аз сарватҳои нодири зеризаминӣ, табиати дилфиреб ва мардуми меҳнатқарин ва меҳмондӯсти Тоҷикистон изҳор дошт. Ёдовар мешавем, ки ширкати мазкур аз соли 2008 инҷониб дар Тоҷикистон дар самти иктишофи конҳои нафту газ фаъолият менамояд. Маврид ба зикр аст, ки сафари ҳайати кории ин ширкати бонуфузи ҷаҳонӣ баҳри рушд ва таҳкими ҳамкориҳои иқтисодии Тоҷикистону Австралия дар самти истихроҷ ва истеҳсоли нафту газ мусоидат хоҳад намуд.