Тоҷикистон ба раванди мониторинги Эъломияи Париж ҳамроҳ гардид

Душанбе, 2 сентябр. (АМИТ «Ховар», Бекназари Абӯбакр). — 30 августи соли 2011 дар шаҳри Душанбе семинари миллӣ дар мавзӯи «Ҳамкорӣ баҳри рушди Тоҷикистон» бахшида ба 20-умин солгарди Истиқлолияти давлатии Ҷумҳурии Тоҷикистон баргузор гардид. Дар семинари мазкур муовини Сарвазири Ҷумҳурии Тоҷикистон Муродалӣ Алимардон, роҳбарони намояндагиҳои дипломатӣ ва ташкилотҳои байналмилалӣ, инчунин роҳбарони аввали вазорату идораҳои ҷумҳурӣ иштирок намуданд. Муродалӣ Алимардон марҳилаҳои ташаккули давлати ҳуқуқбунёд, тараққиёт ва дастовардҳоеро, ки Тоҷикистон дар солҳои соҳибистиқлолӣ ба даст овардааст, ёдовар шуда, қайд намуд, ки нақш ва дастгирие, ки аз ҷониби шарикон ҷиҳати рушди кишварамон ироа шудаанд, ниҳоят муҳиманд. «Ҳангоми мушоҳидаи комёбиҳои Тоҷикистон мехоҳам махсус онро қайд намоям, ки муддати ин солҳо мусоидат ва дастгирии доимӣ аз ҷониби ҷомеаи байналмилалӣ хеле назаррас буд. Кишварҳои донор, созмонҳои байналмилалии молиявӣ, агентиҳои донорӣ ва ташкилотҳои байналмилалӣ ба тамоми фаъолияти ибтидоии мо мусоидат мерасонданд ва расонида истодаанд» — иброз дошт муовини Сарвазири Ҷумҳурии Тоҷикистон.