Ҳадяи синамогарони Ҳинд

Душанбе, 3 октябр. (АМИТ «Ховар», Марзия Саидова). — Шурӯъ аз имрӯз -3 октябр, тавассути Шабакаи аввали телевизони Тоҷикистон филми мустанади ба наворгирифтаи синамогарони Ҳиндустон намоиш дода мешавад. Филм, ки дар бораи Тоҷикистон ба  навор гирифта шудааст, дар он табиати биҳиштосою зебоманзари сарзаминамон, дастовардҳои фарҳангӣ ва ҳунармандони Тоҷикистон таҷассум ёфтаанд. Филм аз панҷ қисм иборат буда, онро ширкати «N.S FILMS»- и Ҳиндустон дар ҳамкорӣ бо Кумитаи радио ва телевизони назди Ҳукумати Ҷумҳурии Тоҷикистон ба навор гирифтаанд. Филм дар сатҳи баланди касбӣ таҳия шуда, аз ҷониби коршиносони бахши синамо баҳои баланд гирифтааст. Филм ба забони англисӣ ба навор гирифта шуда, Нилуфари Шамма продюссераш аст. Филм қаблан тавассути телевизионҳои давлатии Ҳиндустон намоиш дода шуда буд.Филм муддати 5 рӯз -аз 3 то 7 октябри соли равон аз соати 21.00 пешкаши тамошобинон гардонида мешавад.