Ҳайати ХФМ Федератсияи Русия аз ДСРТ дидан мекунад

Душанбе, 20 октябр. (АМИТ «Ховар»,  Лутфия  Эшонқулова ). – Дар  доираи  иҷлосияи  10 – уми  Шӯрои  роҳбарони  мақомоти  муҳоҷирати  давлатҳои аъзои  ИДМ 21  октябр  ҳайати Хадамоти  федералии  муҳоҷирати  Федератсияи  Русия  бо  роҳбарии  директори муассисаи  номбурда  Константин  Ромодановский   ва  сардори  Хадамоти  муҳоҷирати  назди  Ҳукумати  ҶТ  Сафиаллоҳ  Девонаев аз Донишгоҳи славянии Русия  ва  Тоҷикистон  дидан  мекунанд.Дар  ин  бора  ба  АМИТ «Ховар»  дар  маркази  матбуоти Хадамоти  муҳоҷират иттилоъ  доданд. Дар  чаҳорчӯбаи  ташрифот  шиносоӣ  бо  фаъолияти  Пажӯҳишгоҳи  тадқиқоти  илмии  муҳоҷират  ва  мулоқот  бо  профессорону  муаллимон  ва  роҳбарони созмонҳои ҷавонону  донишҷӯён  аз  рӯи   масоили  мубрами  муҳоҷират  пешбинӣ  шудааст. Мувофиқи  суханони  манбаъ,  Донишгоҳи  славянии  Русия  ва  Тоҷикистон  бояд  дар  оянда  маркази  омӯзиши   илмии  равандҳои  муҳоҷират  гардад, ки ҷалбу  тарбияи  мутахассисони  бахши  муҳоҷират  ба  ин  мусоидат  менамояд. Хотирнишон  месозем, ки  Пажӯҳишгоҳи  тадқиқоти  илмии  назди Донишгоҳи  славянии  Русия  ва  Тоҷикистон ягона   пажӯҳишгоҳи  Осиёи  Марказӣ ҷиҳати  таҳлили  проблемаҳои  муҳоҷират  мебошад.