Чармгарони Поён обод мешавад

Душанбе, 13 октябр. (АМИТ «Ховар», Лаззат Диловарзод).- Ба иттилои сармеъмори шаҳри Кӯлоб Озодӣ Ҳасанов,  бо саршавии  соли нави 2012 корҳои ободкорӣ дар маҳаллаи Чармгарони Поён оғоз меёбанд. Дар навбати аввал бунёди як бинои панҷошёна дар нақша аст, ки он дар  ҷойи  хонаи 20 оила сохта мешавад.  Баробари ба истифода додани хонаи баландошёна беш аз 100 оила метавонад дар шароити беҳтару хубтар зиндагӣ намояд. Мақсад аз бунёди хонаҳои баландошёна аз соҳили дарёчаи Тебалай дуртар ҷой додан ва дар шароити бехавф зиндагӣ кардани мардуми ин маҳалла аст. Дар асоси қарори ҳукумати маҳаллӣ  онҳое, ки хонаҳояшон ҳамагӣ 10 метр аз соҳили дарёча  дуртар ҷой гирифтаанд,   ба ҷойи дигар кӯчонида шуда,   бо замин барои  сохтмон  таъмин мешаванд.