Истихроҷи маъданҳои кӯҳӣ ва кимиёвӣ муҳокима шуд

Душанбе, 14 октябр. (АМИТ «Ховар», Пайрав Назаров). —  Сафири Фавқулодда ва Мухтори Ҷумҳурии Тоҷикистон дар Ҷумҳурии Туркия Фаррух Шарипов бо волии Анқара Аладдин Юксел вохӯрӣ доир намуд. Зимни мулоқот масоили ҳамкориҳои иқтисодӣ-тиҷоратӣ, илмӣ-техникӣ ва истеҳсолӣ, ташкили корхонаҳои муштарак дар соҳаҳои саноати сабук ва хӯрокворӣ, истихроҷи маъданҳои кӯҳӣ ва кимиёвӣ, коркарди маҳсулоти кишоварзӣ, тайёр намудани мутахассисони гуногунихтисос ва бо соҳибкорону сармоягузорони бонуфузи вилояти Анқара омода намудани бизнес-форум баррасӣ гардиданд. Дар ҷараёни мулоқот А. Юксел ба лоиҳаҳои сармоягузорӣ таваҷҷӯҳи хосса зоҳир намуда, ҷиҳати густариши ҳамкориҳои мутақобилан судманд дар соҳаи комплекси агросаноатӣ ва коркарди маъдан омодагии худро иброз дошт. Ҳамзамон, тавре  аз раёсати иттилоот, матбуот, таҳлил ва тарҳрезии сиёсати хориҷии ВКХ ҶТ иттилоъ доданд, волӣ ба роҳбарияти Палатаи савдо ва саноати Анқара ва Иттиҳодияи саноатчиёни Анқара ҷиҳати ба роҳ мондани ҳамкории иқтисодӣ-тиҷоратӣ дар соҳаи сайёҳӣ, кишоварзӣ ва коркарди маъдан, ташкил намудани сафари соҳибкорони Анқараро ба Тоҷикистон супориш дод.