Муҳокимаи ҳамкориҳои дуҷонибаи Тоҷикистон ва Афғонистон

Душанбе, 25 октябр. (АМИТ «Ховар», Пайрав Назаров). — Имрӯз мулоқоти Вазири корҳои хориҷии Ҷумҳурии Тоҷикистон Ҳамрохон Зарифӣ бо Вазир оид ба масъалаҳои мубориза бар зидди маводи мухаддири Ҷумҳурии Исломии Афғонистон Зироаҳмад Муқбили Усмонӣ баргузор гардид.Тавре ки аз раёсати иттилоот, матбуот, таҳлил ва тарҳрезии сиёсати хориҷии ВКХ ҶТ иттилоъ доданд, зимни мулоқот масъалаҳои ҳамкориҳои дуҷонибаи Тоҷикистон ва Афғонистон дар мубориза алайҳи маводи мухаддир ва ҷинояткорӣ дар минтақа ва лоиҳаи Барномаи минтақавии мубориза алайҳи маводи мухаддир дар Афғонистон ва кишварҳои ҳамсояи он, ки аз ҷониби Раёсати СММ оид ба маводи мухаддир ва ҷиноёт пешниҳод гардидааст, баррасӣ шудаанд.Дар мулоқот ҳамчунин Сафири Фавқулода ва Мухтори Ҷумҳурии Исломии Афғонистон дар Ҷумҳурии Тоҷикистон Абдуғаффори Орзу ва сардори намояндагии Раёсати СММ оид ба маводи мухаддир ва ҷиноёт дар Ҷумҳурии Исломии Афғонистон Жан Люк Лемайе низ ҳузур доштанд.