«Роғун — ифтихори миллат»

Душанбе, 4 октябр. (АМИТ «Ховар», Дилшодаи Хайруллоҳ).- Нашриёти «Адиб»     ҳафтаи гузашта якчанд китоби навро  чоп намуд.Аз ҷумла, китоби нависанда Раҷабалӣ Аҳмад таҳти  унвони «Роғун- ифтихори миллат»  нашр гардид. Китоб аз очерку публисистика иборат буда, ба чор бахши алоҳида ҷудо шудааст.Дар ин бахшҳо маводе ҷо гирифтаанд, ки перомуни фидокорӣ, корнамоиҳои диловаронаи бинокорони сарбаланди нерӯгоҳи бузурги аср сухан мегӯянд. Муаллиф гуфтору рафтори қаҳрамонҳояшро дар рӯҳи худогоҳӣ ва хештаншиносӣ нисбат ба Ватан ва халқ ба қалам додааст.Мутолиаи ин китоб барои наслҳои имрӯзу фардо аз манфиат холӣ нест.«Назокати Роҳат» китоби дуюми  шоираи ҷавону умедбахш Гулнисои Ато мебошад, ки  ба табъ расид. Китоб аз шеърҳое, ки ба мавзӯъҳои муҳаббату ҷавонӣ, муҳаббат ба Ватан, модар, ваҳдату истиқлолият бахшида шудаанд, иборат аст.Китоб дар нашриёти «Адиб» чоп шудааст.