Соли 2012 дар шаҳри Душанбе ҷаласаи Шӯрои ВКХ доир мегардад

Душанбе, 10 октябр. (АМИТ «Ховар», Пайрав Назаров). — Имрӯз дар давлати Кувайт ҷаласаи 10-уми Шӯрои вазирони корҳои хориҷии кишварҳои узви Муколамаи ҳамкории Осиё доир мегардад. Дар ҷаласа ҳайати Ҷумҳурии Тоҷикистон таҳти роҳбарии Вазири корҳои хориҷии кишвар Ҳамрохон Зарифӣ иштирок менамояд.
Муколамаи ҳамкории Осиё моҳи июни соли 2002 бо ташаббуси Тайиланд оғоз ёфта ва дар чаҳорчӯби он 1-умин ҷаласаи вазирони корҳои хориҷии кишварҳои Осиё баргузор гардид. Он аз ҷониби 18 кишвари осиёӣ таъсис дода шуда, дар ҳоли ҳозир аз 31 кишвари узв иборат аст.
Муколамаи ҳамкории Осиё форуми аввалини умумиосиёии хос мебошад, ки мақсади он муҳокимаи масъалаҳои ҳамкории минтақавӣ дар соҳаҳои энергетика, кишоварзӣ, биотехнология, сайёҳӣ, коҳиши сатҳи камбизоатӣ, рушди технологияҳои иттилоотӣ, ҳамкории молиявӣ ва ғайра мебошад. Ҷумҳурии Тоҷикистон ба Муколамаи ҳамкории Осиё 5 июни соли 2006 ҳамроҳ шуд.

Ёдовар мешавем, ки баргузории 11-ум ҷаласаи Шӯрои вазирони корҳои хориҷии кишварҳои узви Муколамаи ҳамкории Осиё соли 2012 дар шаҳри Душанбе пешбинӣ шудааст.
Дар ин бора ба АМИТ «Ховар» аз Раёсати иттилоот, матбуот, таҳлил ва тарҳрезии сиёсати хориҷии ВКХ ҶТ иттилоъ доданд.