Суғд: ду ноҳия супориши пахтасупориро иҷро намуд

Хуҷанд, 5 октябр. (АМИТ «Ховар»,  Санавбар  Мақсудова). – Пахтакорони  ноҳияҳои  Ашт ва  Конибодоми  вилояти  Суғд  аз иҷрои супориши  солонаи ҷамъоварии  хосили  пахта хабар  доданд.Дар  ин  бора  муовини  раиси  вилояти  Суғд  Аҳмадҷон Қобилов  ба  хабарнигори  АМИТ «Ховар»  иттилоъ  дод. Мувофиқи  суханони  манбаъ,  пахтакорони  ноҳияи  Ашт  то  имрӯз  8  ҳазору  74  тонна   пахта ҷамъовари  намудаанд, ки  ин аз  супориши  пешбинишуда 74  тонна  зиёд  аст. Деҳқонони  ноҳияи  Конибодом  ба ҷойи  12  ҳазор  тоннаи  нақша  12 ҳазору  506 тонна «тиллои  сафед» ҷамъоварӣ  намудаанд. Пахтакорони  ноҳияҳои  Масчоҳ,  Ҷаббор  Расулов  ва  Бобоҷон  Ғафуров дар  арафаи  иҷрои нақша  мебошанд. Деҳқонони  ноҳияҳои  номбурда  то  имрӯз  аз  70  то  87  фоизи  супориши  пешбинишударо   иҷро  намудаанд. То  имрӯз  дар  вилояти  Суғд  ҷамъ 80  ҳазору  495  тонна  пахта  ғундошта шудааст, ки  ин  баробари 76,66 фоизи  супориш  мебошад.