Ҳурмати пиронро ба ҷо орем

Душанбе, 8 ноябр. (АМИТ «Ховар», Бекназари Абӯбакр). — Раиси шаҳри Хуҷанд Раҷаббой Каримов дар арафаи Иди Қурбон собиқадорони меҳнат, ходимони намоёни сиёсӣ ва давлативу ҷамъиятиро аёдат карда, онҳоро аз номи Президенти Ҷумҳурии Тоҷикистон Эмомалӣ Раҳмон ва раиси вилояти Суғд Қоҳир Расулзода бо Рӯзи Конститутсияи Ҷумҳурии Тоҷикистон ва Иди Қурбон табрик гуфта, дастовезҳои идона тақдим намуд. Аз маркази матбуоти маъмурияти Хуҷанд ба АМИТ «Ховар» хабар доданд, ки дар  рӯзҳои ид роҳбарият ва намояндагони мақомоти иҷроияи ҳокимияти давлатии шаҳр, вакилони Маҷлиси шаҳрии вакилони халқ, роҳбарони корхонаву муассисаҳо, соҳибкорон ва ашхоси саховатпеша пирони кор, маскунони Хонаи маъюбон, Хонаи ятимон, мактаб – парваришгоҳи махсус, кӯдакистонҳои маъюбони модарзодро аёдат намуда, онҳоро аз ҷиҳати моддиву маънавӣ дастгирӣ карданд.