156 ҷиноят марбут ба моликияти зеҳнӣ ва ҳуқуқи муаллиф

Душанбе, 11 ноябр. (АМИТ «Ховар», Бекназари Абӯбакр). — Имрӯз дар шаҳри Хуҷанд таҳти унвони «Ҳифзи иншооти  моликияти зеҳнӣ» бо иштироки кормандони идора ва ташкилотҳои соҳаҳои иҷтимоӣ ва фарҳангӣ машварат баргузор гардид.  Дар он сармутахассиси шӯъбаи иттилоотию таҳлилии дастгоҳи иҷроияи Президенти Ҷумҳурии Тоҷикистон Алиҷон Шоназаров, мудири шӯъбаи ҳуқуқ, ҳифзи ҳуқуқи муаллиф ва ҳуқуқҳои вобастаи Вазорати фарҳанги Ҷумҳурии Тоҷикистон Нӯъмон Муқимов, сардори шӯъбаи мубориза ба муқобили ҷинояткорӣ дар соҳаи моликияти зеҳнии Раёсати мубориза бар зидди ҷиноятҳои муташаккили Вазорати корҳои дохилии ҷумҳурӣ Убайдулло Одинаев ва дигарон сухан гуфта, доир ба санадҳои меъёрию ҳуқуқии марбут ба соҳа, ҷараёни мубориза бо ҳуқуқвайронкунӣ дар соҳаи моликияти зеҳнӣ маълумот доданд. Аз ҷумла, зикр гардид, ки дар ҷумҳурӣ давоми даҳ моҳи соли ҷорӣ 156 ҷинояти марбут ба моликияти зеҳнӣ ва ҳуқуқи муаллиф ба қайд гирифта шудааст.