Баррасии низоми интихоботӣ ва меъёрҳои байналмилалии он дар Тоҷикистон

Душанбе, 22 ноябр. (АМИТ «Ховар», Бекназари Абӯбакр). — Имрӯз, 22 ноябр дар шаҳри Душанбе мизи мудаввар дар мавзӯи «Инкишоф ва такомули низоми интихоботӣ дар Тоҷикистон: меъёрҳои байналмилалии интихобот» ба кори худ шурӯъ кард, ки то 23 ноябр идома мекунад.Кори мизи мудавварро раиси Комиссияи марказии интихобот ва раъйпурсӣ Шермуҳаммад Шоҳиён оғоз карда, ҳамчунин мушовири калони Президенти ҶТ оид ба сиёсати ҳуқуқӣ Содиқ Шоназаров, раиси Шӯрои адлия Зафар Азизов ва сардори шӯъбаи робитаҳои минтақавии Комиссияи венетсиягии Шӯрои Аврупо Сергей Кузнетсов низ сухан гуфтанд. Дар давоми ду рӯзи кори мизи мудаввар 11 маърӯза шунида ва мавриди баррасӣ қарор дода мешавад. Доираи мавзӯъҳои маърӯзаҳо хеле васеъ буда, назария, таҷриба ва роҳҳои такомули низоми интихобот дар Тоҷикистон, меъёрҳои конститутсионӣ доир ба интихобот дар Тоҷикистон, танзими ҳуқуқии ташвиқоти пешазинтихоботӣ, таъмини иттилоотии интихобот, ҳуқуқу вазифаҳои комисияҳои интихоботӣ, меъёрҳои байналмилалии интихоботи демократӣ, баррасии арзу шикоятҳои субъектҳои интихобот аз ҷониби судҳо ва дигар масъалаҳои ҷараёни ташкил, омодагӣ ва баргузории интихоботро фаро мегиранд. Маврид ба зикр аст, ки мизи мудаввар бо ташаббуси Комиссияи марказии интихобот ва раъйпурсии Ҷумҳурии Тоҷикистон ва бо дастгирии Комиссияи венетсиягӣ баргузор шуда, дар он масъулини ҷараёни интихобот аз ВМКБ, вилоятҳои Суғду Хатлон, шаҳри Душанбе, шаҳру ноҳияҳои тобеи марказ ва намояндагони мақомоти дахлдор ва коршиносони байналмилалӣ иштирок менамоянд.