Чаро фарзандони роҳбарон ба сафи Қувваҳои мусаллаҳ ҷалб намешаванд?

Душанбе, 16 ноябр. (АМИТ «Ховар», Бекназари Абӯбакр). — То имрӯз нақшаи даъвати тирамоҳии ҷавонони солҳои таваллудашон 1984-1993 ба хизмати ҳарбӣ дар вилояти Суғд 80,7 фоиз иҷро гардидааст.Дар ин самт бахусус комиссариатҳои ҳарбии ноҳияҳои Шаҳристон, Зафаробод ва шаҳри Табошар тавонистанд нақшаи худро пеш аз мӯҳлат иҷро кунанд. Аммо дар шаҳру ноҳияҳои Исфара 63,8 фоиз, Панҷакент 71,1 фоиз, Мастчоҳ 72 фоиз, Хуҷанд 73 фоиз, Конибодом 74,9 фоиз, Истаравшан 77,5 ва Б.Ғафуров 77,8 фоизи даъватшавандагон ба қисмҳои ҳарбӣ гусел шудаанду халос.Ба иттилои комиссариати ҳарбии вилоят, бо сабабу баҳонаҳои гуногун 388 нафар роҳбари зинаҳои гуногун дар шаҳру навоҳии вилоят фарзандонашонро аз хизмати ҳарбӣ боздоштаанд.Аз хадамоти матбуоти раиси вилояти Суғд ба АМИТ «Ховар» хабар доданд, ки мутобиқи нақша даъват ба сафи қисмҳои ҳарбӣ бояд дар вилоят то 18 ноябри соли равон таъмин гардад.