Дастаҳои мунтахаби Тоҷикистон ва Ҷопон ба дидори ҳам мераванд

Душанбе, 8 ноябр. (АМИТ «Ховар», Аловиддин Бӯриев). –  Иҷрокунандаи вазифаи сармураббии дастаи мунтахаби Тоҷикистон оид ба футбол Олимҷон Рафиков барои бозиҳои интихобии ҷоми ҷаҳон бо дастаҳои Ҷопон ва Ӯзбекистон, ки рӯзҳои 11 ва 15 ноябр баргузор мегарданд, ҳайати дастаи мунтахабро муайян кард. Нисбат ба бозиҳои пешина ин навбат Олимҷон Рафиков ба ҳайати даста нимҳиммоятгар Илхом Ортиқовро аз ССКА «Помир» ва ҳамлагар Наврӯз Рустамовро аз «Равшан»-и Кӯлоб   даъват накарда ба ҷои онҳо чор бозингари дигар, муҳофизатгар ва нимҳимоятгар  Аҳтам Назаров ва Абдусамад Хоҷибоевро аз «Энергетик», Идибек Ҳабибуллоевро бо ҳамлагар Аҳтам Ҳамроқулов аз дастаҳои «Регар-ТадАЗ» ва «Хайр» ба қатори бозингарон дохил кард. Имрӯзҳо даста дар варзишгоҳи «Авиатор» ба ин бозиҳо тайёрӣ мебинад. Бозӣ бо дастаи мунтахаби Ҷопон рӯзи 11 ноябр дар варзишгоҳи марказии пойтахт дар соати 14 баргузор хоҳад шуд .