Эътирози кассатсионӣ нисбат ба ҳукми суди шаҳри Қурғонтеппа

Душанбе, 15 ноябр. (АМИТ «Ховар», Дилшодаи Хайруллоҳ). -Маркази ахбори Прокуратураи генералии Ҷумҳурии Тоҷикистон хабар медиҳад, ки бинобар вазнин будани ҷазо ба ҳукми суди шаҳри Қурғонтеппаи вилояти Хатлон аз 8 ноябри соли 2011 аз рӯи парвандаи ҷиноятӣ бо айбдории шаҳрванди Федератсияи Русия Садовничий В.В. ва шаҳрванди Ҷумҳурии Эстония Руденко А., ки дар содир намудани ҷиноятҳои пешбинишуда дар моддаҳои 218 (вайрон кардани қоидаҳои парвози байналмилалӣ), 289 (қочоқ бо роҳи рахна кардани сарҳади гумрукӣ) ва 335 (ғайриқонунӣ гузаштан аз сарҳади давлатӣ) Кодекси ҷиноятии Ҷумҳурии Тоҷикистон гунаҳкор дониста шуда, ба мӯҳлати 8 солу 6 моҳӣ аз озодӣ маҳрум гардида буданд, аз тарафи айбдоркунандаи давлатӣ – корманди прокуратураи вилояти Хатлон эътирози кассатсионӣ оварда, барои баррасӣ тавассути суди марҳилаи якум ба суди вилояти Хатлон ирсол карда шудааст.