Фақат маълумотнокии соҳаи энергетикӣ лозим

Душанбе, 16 ноябр. (АМИТ «Ховар», Лаззат Диловарзод).- Қонуни Ҷумҳурии Тоҷикистон «Дар бораи истифодаи манбаъҳои барқароршавандаи энергия», ки соли 2010 қабул шудааст, аз зумраи қонунҳоест, ки муносибатҳои ҳуқуқиро байни мақомоти давлатӣ, шахсони воқеӣ ва ҳуқуқӣ дар соҳаи истифодаи манбаъҳои барқароршавандаи энергия танзим менамояд,- иброз дошт дотсенти Донишгоҳи техникии Тоҷикистон ба номи академик Муҳаммад Осимӣ А. Абдураҳмонов ба мухбири АМИТ «Ховар».Ба гуфти олим, Ҷумҳурии Тоҷикистон 60 фоизи захираҳои энергетикии Осиёи Марказиро дар бар мегирад ва мо имкон дорем ин 60 фоизро дар ҳаёти иқтисодию маишӣ пурра истифода намоем.Бо дастрасии қонуни мазкур моро лозим аст аз захираю манбаъҳои барқароршавандаи нерӯи офтоб, бод ва ҷараёни об ба таври самарабахш истифода барем.Тоҷикистон дар давоми сол беш аз 300 рӯзи офтобӣ дорад, ки барои бунёди нерӯгоҳҳои офтобию бодӣ хеле мусоид аст, аммо бобати тартиби амалкунандаи гирифтани иҷозатномаи истифодаи манбаъҳои барқароршавандаи энергия дар кишвар маълумотнокии кормандони мақомоти гуногун вобаста ба истифодаи манбаъҳои барқароршавандаи энергия чандон мукаммал нест. Аз ин рӯ зарур аст барои баланд бардоштани маълумотнокии энергетикӣ миёни аҳолӣ ва идораю ташкилоту муассисаҳо бештар саъю талош варзем,- афзуд олим.