Курсҳои махсуси забономӯзӣ ва ихтисосҳои замонавӣ барои муҳоҷирони меҳнатӣ

Душанбе, 24 ноябр. (АМИТ «Ховар», Покиза Маҳмадбекова). – 23 ноябри соли равон сардори Хадамоти мухоҷирати назди Ҳукумати ҶТ Сафиалло Девонаев бо намояндагони Федератсияи байналмилалии ҷамъияти Салиби Сурх ва Ҳилоли Аҳмар Эрик Мишел Селлие ва Фаррух Қосимов вохӯрӣ намуд. Ба мухбири АМИТ «Ховар» аз Хадамоти мазкур иттилоъ доданд, ки дар рафти мулоқот С. Девонаев меҳмононро бо сохтори хадамот шинос намуд. Бояд гуфт, ки айни ҳол дар манотиқи Тоҷикистон ҷамъияти Салиби сурх 5 нуқтаи худро дорад ва дар назар аст, ки боз 2 нуқтаи дигар кушода шавад. Дар доираи вохӯрӣ тарафайн перомуни муҳоҷират ва буду боши муҳоҷирони меҳнатӣ дар хориҷи кишвар ва ҳифзи саломатии муҳоҷирон машварат намуданд. Ҳамаи ин ҷиҳатҳоро ба назар гирифта, мақомоти дахлдор вазифадоранд, ки ба муҳоҷирони худ забон ва ихтисос омӯзонида, аз муоинаи тиббӣ гузаронида, баъдан онҳоро ба кишварҳои пазиранда фиристанд. Ба муҳоҷирон танҳо дар сурате иҷозати кор дода мешавад, ки онҳо пурра солим ва ба талаботи кишвари қабулкунанда ҷавобгӯй бошанд. Аз ин лиҳоз тарафайн ба хулосае омаданд, ки дар оянда як маркази муҳоҷират ташкил диханд то дар курсҳои он ба хоҳишмандон забонҳои хориҷӣ ва ихтисосҳои замонавӣ омӯзонида шаванд. Пешниҳод шуд, ки марказҳои муҳоҷират бояд дастурамали махсус перомуни одоби муошират, пешгирии бемориҳои сироятӣ, кӯмаки аввалиндараҷаи тиббӣ, беҳдошт ва маданияти либоспўшӣ дошта бошанд.