Манфиати мардуми азияткашидаи афғонро афзалиятнок шуморед

Душанбе, 3 ноябр. (АМИТ «Ховар», Мавҷуда Анварӣ). — Дар Конфронс оид ба Афғонистон «Амният ва ҳамкорӣ дар Қалби Осиё» Вазири корҳои хориҷии Ҷумҳурии Тоҷикистон Ҳамрохон Зарифӣ сухан гуфта, изҳори боварӣ кард, ки вохӯрии мазкур марҳилаи муҳиме дар роҳи барқарорсозии сулҳ, амният ва субот, ҳамчунин барои фароҳам овардани шароити мусоиди рушди иқтисодӣ ва иҷтимоӣ дар Афғонистон мебошад. Ӯ ба раванди ҳамгироии иқтисодӣ ва ҳамкории тиҷоратӣ ҳамроҳ намудани Афғонистон бо кишварҳои ҳамсояро омили муҳим номид. Вазири корҳои хориҷии Тоҷикистон изҳор дошт, ки: «новобаста ба ихтилофи назарҳо ва диди мухталиф ба услубҳои ҳалли масоил, зарурати таъҷилии пайдо ва қабул намудани қарорҳои якдилона бар нафъи пойдории амну субот дар Афғонистон вуҷуд дорад». Вобаста ба ин, дипломати тоҷик аз ҳамагон даъват ба амал овард, ки на мушкилоту ҳадафҳои мағруру муғризонаи минтақавӣ ё миллӣ, балки манфиати мардуми азияткашидаи Афғонистонро афзалиятнок шуморанд.Дар конфронс ҳамчунин роҳбарони ҳайатҳо аз кишварҳои Аврупо ва созмонҳои байналмилалӣ суханронӣ  намуданд.