Муқовимат бар зидди гардиши ғайриқонунии маводи ҳастаӣ

Душанбе, 18 ноябр. (АМИТ «Ховар», Пайрав Назаров). 18 ноябри соли 2011 дар Вазорати корҳои хориҷии Ҷумҳурии Тоҷикистон маросими ба имзо расонидани нақшаи амали муштарак миёни Ҳукумати Ҷумҳурии Тоҷикистон ва Ҳукумати Иёлоти Муттаҳидаи Амрико оид ба муқовимат бо гардиши ғайриқонунии маводи ҳастаӣ баргузор шуд. Тавре ки аз раёсати иттилоот, матбуот, таҳлил ва тарҳрезии сиёсати хориҷии ВКХ ҶТ ба АМИТ «Ховар» хабар доданд, ба ҳуҷҷати мазкур аз ҷониби Ҷумҳурии Тоҷикистон Вазири корҳои хориҷии кишвар Ҳамрохон Зарифӣ ва аз ҷониби Иёлоти Муттаҳидаи Амрико Сафири Фавқулодда ва Мухтори ИМА дар Ҷумҳурии Тоҷикистон Кеннет Гросс имзо гузоштанд. «Ин ҳуҷҷат иқдоми сиёсии кишварҳои аҳдкунандаро дар бар гирифта, ҳуҷҷати ӯҳдадоркунандаи ҳуқуқӣ намебошад. Мақсади он пурзӯр намудани иқтидори Ҷумҳурии Тоҷикистон ҷиҳати пешгирӣ, муайянкунӣ ва муқовимат бар зидди гардиши ғайриқонунии маводи ҳастаист», — таъкид намуданд дар вазорат.