Мулоқоти А. Холиқов бо намояндагони иттиҳодияҳои динии ғайриисломӣ

Душанбе, 10 ноябр. (АМИТ «Ховар», Бекназари Абӯбакр). — Имрӯз дар шаҳри Душанбе мулоқоти раиси Кумитаи оид ба корҳои дини назди Ҳукумати Ҷумҳурии Тоҷикистон Абдураҳим Холиқов бо намояндагони иттиҳодияҳои динии ғайриисломӣ дар Ҷумҳурии Тоҷикистон баргузор гардид. Аз маркази матбуоти Кумитаи оид ба корҳои дин ба АМИТ «Ховар» иттилоъ доданд, ки зимни мулоқот маҷмӯи масоили вобаста ба фаъолияти ташкилотҳои ғайриисломӣ дар Тоҷикистон, ҳамкориҳо байни ташкилотҳои динӣ ва ба роҳ мондани фаъолияти онҳо дар чаҳорчӯбаи қонунҳои ҷории ҶТ, бахусус «Қонун дар бораи озодии виҷдон ва иттиҳодияҳои динӣ» муҳокима ва баррасӣ гардид. А. Холиқов доир ба масъалаҳои мавриди таваҷҷӯҳи иштирокдорон изҳори ақида карда, ба ҳамкории бештари эшон бо кумита махсус таъкид намуд. Иттилоъ дода шуд, ки аз ҷониби Кумитаи оид ба корҳои дин дар ояндаи наздик семинар-машваратҳо оид ба фаҳмонидани  ҳар як самти Қонуни ҶТ оид ба фаъолияти иттиҳодияҳои динӣ дар Тоҷикистон ташкил карда мешаванд.