Натиҷаи як санҷиши прокурорӣ оид ба истифодаи замин

Душанбе, 16 ноябр. (АМИТ «Ховар», Лаззат Диловарзод).- Бино ба гуфти муовини прокурори генералии ҶТ, мушовири давлатии адлияи дараҷаи се Ҳабибулло Воҳидов, бо қарори Ҳукумати ҷумҳурӣ аз 29 – уми майи соли 2010 ба ноҳияи Бобоҷон Ғафуров 1 ҳазору 505 гектар замин ҳамчун фонди заминҳои маҳали аҳолинишин ҷудо шуда бошад ҳам, бо гузашти якуним сол ҳамагӣ 510 гектар ё 34 фоизи замини ҷудошуда ба аҳолии эҳтиёҷманд тақсим шудааст.Дар ноҳияи мазкур дар натиҷаи санҷишҳои прокурорӣ баҳри бартараф намудани қонуншиканиҳои замин 18 амр, 45 пешниҳод, 71 эътироз оварда шуда, нисбат ба 11 нафар мансабдор муҷозоти интизомӣ, 179 парвандаи ҳуқуқвайронкунии маъмурӣ, 31 парвандаи ҷиноятӣ оғоз ва 173 аризаи даъвогӣ оиди ба ҳолати аввала баргардонидани замин ба судҳо ирсол шуд, ки дар натиҷа 80 гектар замини ғайриқонунӣ ишғолшуда ба ҳолати аввалааш баргардонида шуд.