Пасту баландшавии нарх дар истеҳсолот

Душанбе, 10 ноябр. (АМИТ «Ховар», Лаззат Диловарзод).- Бино ба маълумоти Агентии омори назди Президенти ҷумҳурӣ,  дар 10 моҳи соли ҷорӣ  пасту баландшавии нархи маҳсулоти гуногуни саноатӣ бо сабаби истеҳсол ва коркарди он ба миён омадааст. Дар моҳҳои сентябр —  октябри соли 2011 пастравии нарх дар истихроҷи канданиҳои фоиданоки сӯзишворию энергетикӣ асосан бо сабаби арзоншавии нархи истихроҷи ангиштсанг 4,3 фоиз,  истихроҷу тоза кардани маъдани қӯрғошиму рӯҳ 4,1 фоиз ба амал омадааст. Қиматшавии нархҳо дар истеҳсоли ҳар гуна  маҳсулоти ғайрифилизии маъданӣ ба истеҳсоли маснуоти бетонӣ 17,9 фоиз, истеҳсоли семент -10,3, хишти бинокорӣ ва сафоли бомпӯшӣ 0,3 фоиз вобаста аст. Зимнан, нархҳо дар истеҳсоли оҳак, гулгаҷ, масолеҳи андова 6,9 фоиз арзон шуд. Дар ин  муддат қиматшавии нархи истеҳсоли ҳар гуна маснуоти филизӣ- 7,7 ва  конструксияҳои фӯлодии бинокорӣ 2,8 фоиз ба қайд гирифта шудааст.