Савдогарони ноболиғ

Кӯлоб, 25 ноябр. (АМИТ «Ховар», С. Холов).-Агентии стандартизатсия, метрология ва нозироти савдо дар минтақаи Кӯлоб беш аз сад падару модарро барои машғул шудани фарзандони ноболиғашон ба савдо ҳушдор додааст. Ҳашт тан волидайни савдогар барои риоя накардани ин амр, ки кӯдакони ноболиғашонро дар дӯконҳои савдо банд кардаанд, ҷарима шуданд. Иброҳим Раҳматов, сардори яке аз шӯъбаҳои Агентӣ мегӯяд, ин наврасон қоидаи савдоро намедонанд ва мутобиқ ба қонунҳои Тоҷикистон набояд ба фурӯши маҳсулот дар дӯконҳое, ки ба номи волидайнашон сабтанд, машғули савдо бошанд.