Тоҷикистону Қазоқистон ҷиҳати интиқоли маводи сӯзишворӣ ба мувофиқа расиданд

Душанбе, 29 ноябр. (АМИТ «Ховар», Бекназари Абӯбакр). — Аз 23 то 27 ноябри соли равон ҳайати Ҷумҳурии Тоҷикистон таҳти роҳбарии раиси Кумитаи давлатии сармоягузорӣ ва идораи амволи давлатии Ҷумхурии Тоҷикистон, ҳамраиси қисми тоҷикистонии Комиссияи байниҳукуматии Тоҷикистону Қазоқистон оид ба ҳамкориҳои иқтисодӣ Давлаталӣ Саидов ҷиҳати иштирок дар ҷаласаи 9-уми Комиссия ба шаҳри Остонаи Ҷумҳурии Қазоқистон сафар намуд. Аз ҷониби Ҷумҳурии Қазоқистон Комиссияро вазири ҳифзи муҳити зисти Ҷумҳурии Қазоқистон Нургалӣ Ашим ҳамраисӣ намуд. Дар доираи ҷаласа зиёда аз 12 масъалаи муҳим, ки чиҳати рушди минбаъдаи ҳамкории дуҷониба равона шудаанд, аз ҷумла масъалаҳои ҳамкории тарафҳо дар соҳаи иқтисодиёт, сармоягузорӣ, энергетика, муҳоҷирати меҳнатӣ, саноати сабук, кишоварзӣ, маориф ва фарҳанг мавриди баррасӣ қарор дода шуданд.Аз Кумитаи давлатии сармоягузорӣ ва идораи амволи давлатӣ ба мухбири АМИТ «Ховар» иттилоъ доданд, ки тарафҳо дар хусуси интиқоли маводи сӯзишворӣ аз Ҷумҳурии Қазоқистон, кушодани корхонаҳои муштарак ва бастани созишномаҳо байни вазорату идораҳои Тоҷикистону Қазоқистон оид ба рушди ҳамкорӣ дар соҳаҳои дахлдор ба мувофиқа расидаанд.