Томас Ачакосо ба Тоҷикистон меояд

Душанбе, 14 ноябр. (АМИТ «Ховар», Лутфия Эшонқулова). – Дар Хадамоти муҳоҷирати назди Ҳукумати ҶТ бо намояндагони Бонки Умумиҷаҳонӣ Матин Холматов ва Таҳмина Ҷумъаева мулоқоти корӣ баргузор шуд. Тавре дар маркази матбуоти хадамоти мазкур ба хабарнигори АМИТ «Ховар» хабар доданд, зимни мулоқот масоили семинарии қарибулвуқӯъ дар мавзӯи сарварии ашхоси баландпоя дар ҳукумат ҷиҳати муҳоҷират ва рушд, мавриди муҳокима қарор гирифтанд. Мақсад аз доир намудани семинар мадад ба шахсони масъули тарҳрезии сиёсати муҳоҷирати ҶТ дар амри идора ва танзими равандҳои муҳоҷирати меҳнатӣ мебошад. Дар кори семинари дурӯза бояд мушовир, собиқ вазири муҳоҷирати меҳнатӣ дар Филиппин Томас Ачакосо иштирок намояд. Бояд зикр намуд, ки Томас Ачакосо муаллифи китоби «Дурнамои дарозмуддат ҷиҳати густариши равандҳои муҳоҷират дар Тоҷикистон ва Қирғизистон» мебошад.