Варзишгоҳи «Тоҷикстандарт» таэкван-дочиёнро ба ҳам меорад

Душанбе, 2 ноябр. (АМИТ «Ховар», Бекназари Абӯбакр). — 5-6 ноябри соли равон бахшида ба таҷлили 17-умин солгарди Рӯзи Конституция (Сарқонун)-и Ҷумҳурии Тоҷикистон дар маҷмааи варзишии навбунёди Агентии давлатии «Тоҷикстандарт» воқеъ дар  маҳҳалаи Якачинори шаҳри Душанбе мусобиқаи байналмилалии таэкван-до миёни наврасон баргузор мегардад. Аз маркази матбуоти Агентии «Тоҷикстандарт» ба мухбири АМИТ «Ховар» иттилоъ доданд, ки дар ин мусобиқа таэкван-дочиёни синни 12-18-сола (ҳам духтар ва ҳам писар) аз ҷумҳуриҳои Тоҷикистон, Қазоқистон, Қирғизистон ва Ӯзбекистон ширкат меварзанд. Ташкилкунандаи мусобиқаи мазкур Федератсияи таэкван-дочиёни Тоҷикистон буда, он бо дастгирии Агентии стандартизатсия, метрология, сертификатсия ва нозироти савдои назди Ҳукумати ҶТ, Кумитаи ҷавонон, варзиш ва сайёҳӣ ва ширкати «Мегафон-Тоҷикистон» роҳандозӣ мешавад.