80 нафар корҷӯй роҳхат гирифт

Душанбе, 2 декабр. (АМИТ «Ховар», Мавҷуда Анварӣ). – Имрӯз бо ташаббуси Агентии давлатии ҳифзи иҷтимоӣ, шуғли аҳолӣ ва муҳоҷират дар бинои Маркази таълими калонсолони Тоҷикистон ярмаркаи умумишаҳрии ҷойҳои кории холӣ ва вазифаҳои озод баргузор гардид. Тавре ки аз Агентии мазкур ба АМИТ «Ховар» иттилоъ доданд, дар ярмарка 49 муассиса ва ташкилоту корхонаҳои шаҳри Душанбе, аз ҷумла Кумитаи давлатии заминсозӣ ва геодезии ҶТ, КВД «Ширкати алюминии тоҷик», Ҷамъияти саҳомии кушодаи «СТС Иншоот» иштирок ва ба корҷӯён 2061 ҷойи кори холӣ ва вакансияҳои озодро пешниҳод намуданд.«Тавассути ин ярмарка ба 80 нафар корҷӯй барои бо кор таъмин шудан аз ҷониби мақомоти Агентӣ роҳхат дода шуд. Инчунин барои омӯхтани касбҳои дилхоҳ 15 нафар бо роҳхат ба муассисаҳои таълимии назди Агентӣ фиристода шуданд»-, илова намуд манбаъ.