Ашъори Мирзо Турсунзода дар Маскав танинандоз шуд

Маскав, 5 декабр. (АМИТ «Ховар», Ҳалима Хушқадамова ). – Чанде пеш дар Сафорати Тоҷикистон дар Русия бахшида ба 100 – солагии зодрӯзи устод Мирзо Турсунзода конфронси илмию адабӣ баргузор шуд. Сафири Ҷумҳурии Тоҷикистон дар Федератсияи Русия Абдулмаҷид Достиев зимни суханрониаш иброз дошт, ки 100 – солагии шоири бузурги замон Мирзо Турсунзода дар Ватанаш аз деҳоти дурдуст то пойтахти Ҷумҳурии Тоҷикистон дар сатҳи баланд таҷлил шуд. Мувофиқи суханони ӯ, «Маскав ва Санкт – Петербург барои Тоҷикистон марказҳои муҳимтарини илму фарҳанг маҳсуб шуда, сокинони онҳо эҷодиёти фарзандони бузурги халқи тоҷикро меомӯзанд. Устод Мирзо Турсунзодаро дар Маскаву Русия хуб мешиносанд ва дар ин ҷо ҳамкасбону ҳамқаламонаш зиндагӣ мекунанд. Аз ин ҷост, ки ҳаводорони сершумори эҷодиёти Мирзо Турсунзода дар ин ҷо ҷамъ омадаанд, ки номи неки ӯро бори дигар хотирнишон созанд». Сафир гуфт, ки баҳори соли 2012 бояд дар шаҳри Маскав бахшида ба 100 – солагии Мирзо Турсунзода конфронси байналмилалӣ доир гардад. Дар конфронс доктори илми филология, шарқшиноси маъруфи Русия Наталя Пригарина, шоиру тарҷумон Михаил Синелников ва дигарон дар бораи ҳаёту эҷодиёти Мирзо Турсунзода сухан карданд.Сипас донишҷӯёни Донишгоҳи давлатии адабии Маскав, ки забони тоҷикиро меомӯзанд, ва шунавандагони Академияи дипломатии Вазорати корҳои хориҷии Федератсияи Русия аз Тоҷикистон порчаҳоро аз достони «Ҷони ширин» қироат намуданд.