Аввалин академияи футбол дар Тоҷикистон

Душанбе, 14 декабр. ( АМИТ «Ховар», Аловиддин Бӯриев).- Тавре ки сомонаи клуби футболи «Истиқлол» хабар додааст, роҳбарияти дастаи «Истиқлол» ният дорад дар моҳи марти соли 2012 бахшида ба иди «Наврӯз» дар Тоҷикистон аввалин академияи футболро ифтитоҳ намояд. Дар академияи мазкур беҳтарин футболбозони лаёқатманди аз 12 то 16 сола аз саросари ҷумҳурӣ гирд оварда хоҳанд шуд. Майдони бозӣ ва қароргоҳи академия дар дараи Алмосии ноҳияи Ҳисор ҷойгир хоҳад шуд. Ташкили академия ба ривоҷи футболи ҷумхурӣ ва тарбияи футболбозони касбӣ барои клуби футболи «Истиқлол» манфиати бештар хоҳад дошт. Бо ин максад мураббиён Сергей Ли, Аҳлиддин Турдиев, Ҳикмат Фузайлов ва Нӯъмон Юсупов барои омӯзиш ба мактабҳои ҷавонону наврасони клуби футболи «Рубин»-и Қазон фиристода шуданд.