Ба қонуни милитсия илова ворид карда шуд

Душанбе, 28 декабр.(АМИТ «Ховар», Марзия Саидова).- Вакилони палатаи поёнии парлумони мамлакат 29 декабр дар ҷаласаи навбатӣ ба лоиҳаи Қонуни Ҷумҳурии Тоҷикистон «Дар бораи милитсия» илова ворид намуданд. «Ҳадаф аз ворид намудани илова ба қонуни милитсия муайян намудани механизми ҷойивазкунии ҳайати роҳбарикунандаи мақомоти корҳои дохилӣ аст», гуфт муовини аввали вазири корҳои дохилии ҷумҳурӣ Рамазон Раҳимов. Ин тадбир бо мақсади истифодаи самараноки маҳорати касбии хизматчиёни давлатӣ ва пешгирии зуҳуроти коррупсионӣ ва бархӯрди манфиатҳо дар мақомоти давлатии ҷумҳурӣ андешида шудааст. Муовини вазир афзуд, ки мӯҳлати хизмат дар вазифаи баландпояи мақомоти корҳои дохилиро Ҳукумати ҷумҳурӣ тасдиқ мекунад. Механизми ҷойивазкунӣ ба сардорони шӯъбаҳои корҳои дохилии ноҳияҳо, раёсатҳои корҳои дохилии шаҳру вилоятҳо ва сардорони раёсатҳои дастгоҳи марказии ВКД –и ҷумҳурӣ марбут аст. Тибқи механизми ҷойивазкунии ҳайати роҳбарикунандаи мақомоти корҳои дохилӣ, мӯҳлати хизмати сардорони шӯъбаҳою раёсатҳо то чор сол муқаррар шудааст, ки он ба истифодаи самараноки нерӯи кадрӣ ва ҷилавгирӣ аз ришваситонӣ мусоидат менамояд.