Бартанг ободу зебо мегардад

Душанбе, 20 декабр. (АМИТ «Ховар», Лаззат Диловарзод).- Тӯли солҳои истиқлолият тамоми соҳаҳои иқтисодию иҷтимоии води Бартангро тағйироти куллӣ фаро гирифт. Дар давоми бист сол дар чор ҷамоати деҳоти Бартанг 9 мактаби нави замонавӣ сохта ва 12 бунгоҳи тиббӣ аз таъмир бароварда шуд. Дар деҳаи Савноб бошад, табобатгоҳи минтақавӣ мавриди истифода қарор ёфт.Бо супориши раиси Вилояти Мухтори Кӯҳистони Бадахшон Қодири Қосим дар водии Бартанг муассисаи мустақили нигоҳдории роҳҳои автомобилгард ташкил меёбад.Ба гуфти раиси ВМКБ Қ. Қосим, дар давоми солҳои 2012 – 2013 дар деҳаи Рошорв бо дастгирии молиявии ширкати «Помирэнержи» нерӯгоҳи хурди барқи обии 600 кВта сохта мешавад. Дар назар аст, ки вобаста ба бехатаргардонии вазъи кӯли Сарез дар ин ҷо нерӯгоҳи барқи обии иқтидораш 225 мегаватт сохта шавад. Ин нерӯгоҳ нафақат мардуми води Бартанг, балки ноҳияи Рӯшон ва Бадахшони Афғонистонро низ бо барқи арзон таъмин менамояд.